കേരള ബ്ലാസ്‌റ്റേഴ്‌സിനെ സംബന്ധിച്ച് അത്ര നല്ല സമയത്തിലൂടെയല്ല കടന്നു പോകുന്നത്. വിജയങ്ങൾ നേടാൻ പതറുന്ന ടീം പോയിന്റ് ടേബിളിൽ പത്താം സ്ഥാനത്തേക്ക് വീണിട്ടുണ്ട്. സീസണിന്റെ തുടക്കത്തിൽ പ്രതീക്ഷ നൽകിയ ടീമിനിപ്പോൾ പ്ലേ ഓഫ് ഉറപ്പിക്കാൻ കഴിയുമോയെന്നാണ് ഏവരും ഉറ്റു നോക്കുന്നത്.
ടീമിന്റെ മുന്നേറ്റനിര മികച്ച പ്രകടനമാണ് നടത്തുന്നത്. നോഹ സദോയി, ജീസസ് ജിമിനാസ് എന്നീ താരങ്ങളും പകരക്കാരനായി ഇറങ്ങുന്ന പെപ്രയുമെല്ലാം ഗംഭീര പ്രകടനം നടത്തുന്നു. എന്നാൽ പിൻനിരയിലും മധ്യനിരയിലുമൊന്നും അതെ നിലവാരം പുലർത്താൻ താരങ്ങൾക്ക് കഴിയുന്നില്ല.
🚨| Official: Kwame Peprah selected as KBFC October Player Of The Month 🌟🇬🇭 #KBF pic.twitter.com/jwVu0rIJAb
— KBFC XTRA (@kbfcxtra) November 13, 2024
അതിനിടയിൽ കേരള ബ്ലാസ്റ്റേഴ്‌സിന്റെ ഒക്ടോബർ മാസത്തിലെ മികച്ച താരമായി ക്വാമേ പെപ്രയെ തിരഞ്ഞെടുത്തിട്ടുണ്ട്. പല മത്സരങ്ങളിലും പകരക്കാരനായി ഇറങ്ങിയതാണ് പെപ്ര ഈ നേട്ടം സ്വന്തമാക്കിയതെന്നാണ് പ്രത്യേകം ശ്രദ്ധിക്കേണ്ട കാര്യം.
ഒക്ടോബറിൽ മൂന്നു മത്സരങ്ങളിൽ ഇറങ്ങിയ പെപ്ര ഒരു ഗോൾ മാത്രമേ നേടിയിട്ടുള്ളൂ. എന്നാൽ താരം നടത്തിയ പോരാട്ടവീര്യം ആരാധകരെ ത്രസിപ്പിക്കുന്നതായിരുന്നു. കേരള ബ്ലാസ്റ്റേഴ്‌സിൽ അത്തരമൊരു മനോഭാവമുള്ള ഒരേയൊരു താരം പെപ്രയാണെന്നു പറയാതിരിക്കാൻ കഴിയില്ല.
തോൽവിയിലേക്ക് പോകുന്ന ടീമിനെ ആത്മവിശ്വാസം നൽകി തിരിച്ചു കൊണ്ടുവരാൻ താരത്തിന് കഴിയുന്നുണ്ട്. എന്നാൽ കഴിഞ്ഞ മത്സരത്തിൽ ചുവപ്പുകാർഡ് നേടിയത് പോലെയുള്ള അബദ്ധങ്ങൾ ആവർത്തിക്കാതിരിക്കാൻ പെപ്ര ശ്രദ്ധിക്കേണ്ടതുണ്ട്.