പ്രീ സീസൺ കളിക്കാത്തതൊന്നും ഒരു പ്രശ്‌നമേയല്ല, കേരള ബ്ലാസ്റ്റേഴ്‌സിൽ പുതിയ ചരിത്രം കുറിച്ച് ജീസസ് ജിമിനസ്
കേരള ബ്ലാസ്റ്റേഴ്‌സിന് പുതിയ ജീവൻ നൽകിയ മത്സരമാണ് കഴിഞ്ഞ ദിവസം ചെന്നൈയിൻ എഫ്‌സിക്കെതിരെ നടന്നത്. തുടർച്ചയായ തോൽവികളിൽ വലഞ്ഞിരുന്ന ടീം സ്വന്തം മൈതാനത്ത് എതിരില്ലാത്ത മൂന്നു ഗോളുകൾക്കാണ് ചെന്നൈയിൻ എഫ്‌സിക്കെതിരെ വിജയം നേടിയത്.
മത്സരത്തിൽ ടീമിന്റെ ആദ്യത്തെ ഗോൾ നേടിയത് പുതിയതായി ടീമിലെത്തിയ സ്‌പാനിഷ്‌ താരം ജീസസ് ജിമിനസായിരുന്നു. ഇതോടെ ഈ സീസണിൽ തുടർച്ചയായി ആറാമത്തെ മത്സരത്തിലാണ് കേരള ബ്ലാസ്റ്റേഴ്‌സിന് വേണ്ടി ജീസസ് ജിമിനസ് ഗോൾ നേടുന്നത്.
🚨| Jesús Jiménez becomes first Kerala Blasters player to score in six consecutive matches. 💥🇪🇸 #KBFC pic.twitter.com/OJwfOtMCot
— KBFC XTRA (@kbfcxtra) November 24, 2024
ഇതിനു മുൻപ് മറ്റൊരു കേരള ബ്ലാസ്റ്റേഴ്‌സ് താരവും തുടർച്ചയായ ആറു മത്സരങ്ങളിൽ ഗോളുകൾ നേടിയിട്ടില്ല. ബ്ലാസ്റ്റേഴ്‌സിൽ ഇതുവരെയുണ്ടായിരുന്ന സ്‌ട്രൈക്കർമാരെക്കാൾ മികച്ച പ്രകടനം തന്നിൽ നിന്നും പ്രതീക്ഷിക്കാൻ കഴിയുമെന്ന് ജിമിനസ് ഇത്രയും മത്സരങ്ങൾ കൊണ്ട് തെളിയിച്ചു കഴിഞ്ഞു.
ട്രാൻസ്‌ഫർ ജാലകത്തിന്റെ അവസാനത്തെ ദിവസങ്ങളിലാണ് ജീസസ് ജിമിനസ് കേരള ബ്ലാസ്റ്റേഴ്‌സിലേക്ക് എത്തുന്നത്. അതുകൊണ്ടു തന്നെ പ്രീ സീസൺ പോലും കളിക്കാൻ താരത്തിന് കഴിഞ്ഞിരുന്നില്ല. എന്നാൽ അതൊന്നും ബാധിക്കാതെ ടീമിനോട് താരം ഒത്തിണങ്ങിക്കഴിഞ്ഞിട്ടുണ്ട്.
ഈ സീസണിലിതു വരെ ഏഴു ഗോളുകളാണ് ജീസസ് ജിമിനസ് നേടിയിരിക്കുന്നത്. ഒരു അസിസ്റ്റും താരത്തിന്റെ പേരിലുണ്ട്. നിലവിൽ ടോപ് സ്കോറർമാരിൽ മൂന്നാം സ്ഥാനത്ത് നിൽക്കുന്ന താരം ഒന്നുകൂടി മെച്ചപ്പെട്ട പ്രകടനം നടത്തിയാൽ ഗോൾഡൻ ബൂട്ട് സ്വന്തമാക്കാൻ കഴിയും.
