ബ്ലാസ്റ്റേഴ്‌സ് ജേഴ്‌സിയിലെ ഗോളടിമികവ്, പുരസ്‌കാരം സ്വന്തമാക്കി ദിമിത്രിയോസ് ഡയമെന്റക്കൊസ്
കേരള ബ്ലാസ്റ്റേഴ്‌സ് ജേഴ്‌സിയിൽ കളിച്ചിട്ടുള്ള മികച്ച സ്‌ട്രൈക്കർമാരിൽ ഒരാളാണ് ദിമിത്രിയോസ് ഡയമെന്റക്കൊസ്. രണ്ടു സീസണുകൾ ബ്ലാസ്റ്റേഴ്‌സിനൊപ്പം ഉണ്ടായിരുന്ന താരം കഴിഞ്ഞ സീസണിൽ ഐഎസ്എൽ ഗോൾഡൻ ബൂട്ട് നേടിയിരുന്നു.
ദിമിത്രിയോസുമായുള്ള കരാർ പുതുക്കാൻ കേരള ബ്ലാസ്റ്റേഴ്‌സ് ആഗ്രഹിച്ചിരുന്നെങ്കിലും പ്രതിഫലവുമായി ബന്ധപ്പെട്ടു താരം ഉയർത്തിയ ആവശ്യങ്ങൾ കാരണം അത് നടന്നില്ല. ഒടുവിൽ താരം കൊൽക്കത്ത ക്ലബായ ഈസ്റ്റ് ബംഗാളിലേക്ക് ചേക്കേറുകയും ചെയ്‌തു.
🚨| Dimitrios Diamantakos picked as @Transfermarkt ISL Player Of The Season 2023/24 🌟🇬🇷 #KBFC pic.twitter.com/GIlqfsLs6Q
— KBFC XTRA (@kbfcxtra) November 21, 2024
ദിമിത്രിയോസ് ബ്ലാസ്റ്റേഴ്‌സ് വിട്ടെങ്കിലും ക്ലബിനൊപ്പം ഉണ്ടായിരുന്ന സമയത്തെ പ്രകടനത്തിന് താരത്തെ തേടി ഒരു പുരസ്‌കാരം എത്തിയിട്ടുണ്ട്. ട്രാൻസ്‌ഫർമാർക്കറ്റിന്റെ കഴിഞ്ഞ സീസണിലെ മികച്ച താരമെന്ന പുരസ്‌കാരമാണ് ദിമിത്രിയോസിനെ തേടിയെത്തിയത്.
കഴിഞ്ഞ സീസണിൽ വെറും പതിനഞ്ചു മത്സരങ്ങളിൽ ആദ്യ ഇലവനിൽ ഇറങ്ങിയ ദിമിത്രിയോസ് പതിമൂന്നു ഗോളുകൾ നേടിയിരുന്നു. അതിനു പുറമെ മൂന്നു ഗോളുകൾക്ക് വഴിയൊരുക്കുകയും ചെയ്‌ത ദിമിത്രിയോസ് ഗോൾഡൻ ബൂട്ട് സ്വന്തമാക്കിയ ആദ്യത്തെ ബ്ലാസ്റ്റേഴ്‌സ് താരമാണ്.
കഴിഞ്ഞ രണ്ടു സീസണുകളിലും മികച്ച പ്രകടനം നടത്തിയെങ്കിലും ഈ സീസണിൽ അതുപോലെ മികവ് ആവർത്തിക്കാൻ ദിമിക്ക് കഴിഞ്ഞിട്ടില്ല. അഞ്ചു മത്സരങ്ങൾ ഈ സീസണിലെ ഐഎസ്എല്ലിൽ കളിച്ച താരം ഒരു ഗോളും ഒരു അസിസ്റ്റും മാത്രമാണ് സ്വന്തമാക്കിയത്.
