മോഹൻ ബഗാൻ താരവുമായി ഇഞ്ചോടിഞ്ചു പോരാട്ടം, ദിമിയെ വിജയിപ്പിക്കേണ്ടത് ആരാധകരുടെ ചുമതലയാണ് | Dimitrios
ഇന്ത്യൻ സൂപ്പർ ലീഗിന്റെ ഈ സീസണിൽ കേരള ബ്ലാസ്‌റ്റേഴ്‌സിനെ എല്ലാ രീതിയിലും ചുമലിലേറ്റിയ താരമാണ് ദിമിത്രിയോസ്. ടീമിലെ പ്രധാന താരങ്ങളിൽ പലർക്കും പരിക്കേറ്റു പുറത്തായി ബ്ലാസ്റ്റേഴ്‌സ് വളരെ മോശം അവസ്ഥയിൽ നിൽക്കുന്ന സമയത്താണ് ദിമിത്രിയോസ് ടീമിന്റെ നെടുന്തൂണായത്. ഈ മോശം അവസ്ഥയിൽ ടീമിനെ പ്ലേ ഓഫിലെത്തിക്കാൻ താരത്തിന് കഴിഞ്ഞു.
പ്ലേ ഓഫിൽ ദിമിത്രിയോസിനു പരിക്ക് കാരണം കളിക്കാൻ കഴിയാതിരുന്നത് ടീമിന് തിരിച്ചടി നൽകിയിരുന്നു. താരം കളിച്ചിരുന്നെങ്കിൽ മുന്നേറാൻ ബ്ലാസ്റ്റേഴ്‌സിന് കഴിയുമായിരുന്നു. എന്തായാലും ഈ സീസണിലെ മികച്ച പ്രകടനത്തോടെ ഐഎസ്എൽ ഗോൾഡൻ ബൂട്ട് ദിമിത്രിയോസിനു സ്വന്തമായി. ആദ്യമായാണ് ഒരു കേരള ബ്ലാസ്റ്റേഴ്‌സ് താരം ഗോൾഡൻ ബൂട്ട് സ്വന്തമാക്കുന്നത്.
ഇപ്പോൾ ഐഎസ്എല്ലിലെ മികച്ച താരത്തിനുള്ള വോട്ടെടുപ്പ് പ്രമുഖ ഫുട്ബോൾ വെബ്‌സൈറ്റായ ട്രാൻസ്‌ഫർ മാർക്കറ്റ് ആരംഭിച്ചിട്ടുണ്ട്. മികച്ച താരത്തെ തിരഞ്ഞെടുക്കാനുള്ള ലിസ്റ്റിലെ പേരുകളിലൊന്ന് ദിമിത്രിയോസിന്റെതാണ്. ട്രാൻസ്‌ഫർ മാർക്കറ്റിന്റെ ഇൻസ്റ്റാഗ്രാം പേജിലെ സ്റ്റോറിയിൽ ആരാധകർക്ക് വോട്ടു രേഖപ്പെടുത്താനുള്ള ലിങ്ക് നൽകിയിട്ടുണ്ട്.
ലിങ്കിൽ കയറിയാൽ മികച്ച ഗോൾകീപ്പർ, മികച്ച ഡിഫൻഡർ, മികച്ച മിഡ്‌ഫീൽഡർ, മികച്ച ഫോർവേഡ് എന്നിവർക്ക് വോട്ടു ചെയ്യേണ്ടതുണ്ട്. അതിനു ശേഷം നമ്മൾ തിരഞ്ഞെടുത്ത താരങ്ങളിൽ നിന്നും സീസണിലെ ഏറ്റവും മികച്ച താരത്തെ തിരഞ്ഞെടുക്കാനുള്ള ഓപ്‌ഷൻ വരും. അതുകൂടി തിരഞ്ഞെടുത്താൽ വോട്ടെടുപ്പ് പൂർത്തിയായതായി കണക്കിലെടുക്കും.
നിലവിൽ ദിമിത്രിയോസും മോഹൻ ബഗാൻ താരമായ കുമ്മിങ്‌സും തമ്മിലാണ് പ്രധാന പോരാട്ടം. ഇന്നലെ പുറത്തു വിട്ട കണക്കുകൾ പ്രകാരം കുമ്മിങ്‌സിന് 27 ശതമാനത്തിലധികം വോട്ടുകളുള്ളപ്പോൾ ദിമിത്രിയോസിനു 21 ശതമാനത്തിലധികം വോട്ടുകൾ മാത്രമേയുള്ളൂ. നമ്മൾ ആരാധകർ ഒത്തുപിടിച്ചാൽ അർഹിച്ച അംഗീകാരം ദിമിത്രിയോസിനെ തേടിയെത്തുക തന്നെ ചെയ്യും.
